paksahafat پاک صحافت
Related Articles
اسلام آباد (پاک صحافت) وزیراعظم شہباز شریف کا کہنا ہے کہ اب قرض نہیں بلکہ سرمایہ کاری کی بات کروں گا۔
تفصیلات کے مطابق وزیراعظم شہباز شریف نے وفاقی کابینہ کے پہلے اجلاس سے خطاب کرتے ہوئے کہا ہے کہ 16 ماہ میں ہماری کارکردگی پوری قوم نے دیکھی۔ ہم قوم کی خدمت کے لیے منتخب ہوئے ہیں۔ 8 فروری کے الیکشن میں قوم نے منقسم مینڈیٹ دیا، 8 فروری کو مختلف جماعتوں کو مینڈیٹ ملا، سب کا احترام کرنا ہوگا۔ ہماری گزشتہ حکومت نے ملک کو ڈیفالٹ سے بچالیا تھا، ملک کو ڈیفالٹ سے بچایا تو اس کے بعد معاملات زیادہ خراب نہیں ہوئے۔
وزیراعظم شہباز شریف کا مزید کہنا تھا کہ اپوزیشن حکومت بنانے میں کامیاب نہیں ہوئی تو ظاہر ہے ہمیں یہ ذمہ داری سنبھالنی تھی، رمضان میں وفاقی حکومت نے 12 ارب روپے کا ریلیف پیکیج دیا ہے۔ موبائل یوٹیلیٹی اسٹورز کو بھی دوبارہ فعال کررہے ہیں، بے نظیر انکم سپورٹ پروگرام میں بھی اضافی رقم دی جارہی ہے۔ سب سے بڑا چیلنج اس وقت مہنگائی ہے، مہنگائی کو کم کرنا ہمارا پہلا امتحان ہے۔
انہوں نے کہا کہ اشیاء کی قیمتوں میں کوئی خرابی برداشت نہیں کریں گے، کوشش ہے کہ صوبائی حکومتوں کے ساتھ مل کر مہنگائی کنٹرول کریں۔ مٹھی بھر اشرافیہ 90 فیصد وسائل پر قابض ہیں، کیا جواز ہے کہ غریب مہنگائی میں پسے اور اشرافیہ کو سبسڈی ملے۔ بجلی کی مد میں سالانہ 500 ارب روپے چوری ہوتی ہے اس میں غریب آدمی کا کیا قصور ہے؟ گیس بجلی کا گردشی قرض پانچ ہزار ارب روپے ہے۔
