paksahafat پاک صحافت
Related Articles
پاک صحافت نیپال میں کل رات آنے والے زلزلے نے بڑی تباہی مچائی ہے۔ زلزلہ ملک کے دور دراز علاقے میں آیا جس کے بعد امدادی اور بچاؤ کا کام جاری ہے۔
اب تک مرنے والوں کی تعداد 125 سے تجاوز کر گئی ہے اور اس میں اضافے کا خدشہ ہے۔
ریکٹر اسکیل پر زلزلے کی شدت 5.6 تھی۔ اس زلزلے کے جھٹکے بھارت کے دارالحکومت نئی دہلی تک محسوس کیے گئے۔ سوشل میڈیا پر پوسٹ کی گئی ویڈیوز اور تصاویر میں لوگوں کو اندھیرے میں دوسروں کو بچانے کی کوشش کرتے دکھایا گیا ہے۔
صوبہ کرنالی کی پولیس نے بتایا کہ 100 سے زائد افراد زخمی ہوئے ہیں اور چونکہ یہ بہت دور دراز علاقہ ہے اس لیے وہاں سے معلومات حاصل کرنا مشکل ہے۔
پولیس حکام کا کہنا ہے کہ زلزلے کے باعث سڑکوں کو نقصان پہنچا ہے تاہم سیکیورٹی اور امدادی ٹیمیں دیگر راستوں سے متاثرہ علاقے میں پہنچ گئی ہیں۔
نیپال کی وزارت داخلہ کے ترجمان نارائن پرساد بھٹارائی نے کہا کہ ہمیں اطلاع ملی ہے کہ دو اضلاع میں زلزلے کی وجہ سے جان و مال کا نقصان ہوا ہے۔
نیپال کے وزیر اعظم پشپا کمل نے گہرے دکھ کا اظہار کیا ہے۔
نیپال ان علاقوں میں سے ایک ہے جہاں زلزلے آتے رہتے ہیں لیکن 2015 میں یہاں 7.8 شدت کا زلزلہ آیا تھا جس میں تقریباً 9 ہزار افراد جان کی بازی ہار گئے تھے۔
