فیس بک روس کے سرکاری میڈیا کو پلیٹ فارم سے پیسہ کمانے سے روک رہا ہے

ماسکو {پاک صحافت} سوشل نیٹ ورک فیس بک نے اعلان کیا ہے کہ اس نے روسی سرکاری میڈیا کے لیے اس پلیٹ فارم سے پیسے کمانے کا راستہ بند کر دیا ہے۔

فیس بک کی سیکیورٹی پالیسی کے سربراہ نے ایک ٹویٹ میں لکھا، “یوکرین میں جنگ کیف کی سڑکوں پر پہنچ گئی ہے، یہی وجہ ہے کہ ہم نے روس کے سرکاری میڈیا کو دنیا میں کہیں بھی اپنے پلیٹ فارم پر اشتہارات دینے یا پیسہ کمانے پر پابندی لگا دی ہے”۔

ناتھانیئل گلیچر نے یہ بھی اعلان کیا کہ اس فیصلے پر تیزی سے عمل درآمد کیا جائے گا۔

فیس بک کی پیرنٹ کمپنی میٹا نے کل (جمعہ) صبح اعلان کیا کہ روس نے سوشل نیٹ ورک تک رسائی کو محدود کرنے اور اسے سست کرنے کا فیصلہ کیا ہے۔

ماسکو نے امریکی سوشل نیٹ ورکس پر روسی میڈیا کو سنسر کرنے اور روسی شہریوں کے انسانی حقوق کی خلاف ورزی کا الزام لگایا ہے۔

یوکرین میں جنگ آج (ہفتہ) تیسرے روز میں داخل ہوگئی اور جنگ کی آگ جیسے جیسے جاری ہے، اس واقعے پر عالمی ردعمل کا سیلاب جاری ہے اور روس کے خلاف سفارتی دباؤ، دھمکیوں اور بین الاقوامی پابندیوں میں اضافہ ہورہا ہے۔