paksahafat پاک صحافت
Related Articles
اسلام آباد (پاک صحافت) پاکستان نے ڈیرہ اسماعیل خان میں دہشت گردی پر افغان ناظم الامور کو دفتر خارجہ طلب کرکے شدید احتجاج ریکارڈ کرایا۔
دفتر خارجہ کے مطابق سکریٹری خارجہ نے عبوری افغان حکومت کے ناظم الامور کو طلب کیا تاکہ ڈیرہ اسماعیل خان کے علاقے درابن میں پاکستانی سیکورٹی فورسز کی پوسٹ پر آج ہوئے مہلک دہشت گردانہ حملے کے تناظر میں پاکستان کی مضبوط ڈیمارچ فراہم کی جائے۔ دفتر خارجہ کے بیان میں کہا گیا کہ حملہ کی ذمہ داری تحریک طالبان پاکستان سے وابستہ ایک دہشت گرد گروپ تحریک جہاد پاکستان نے قبول کی ہے، اس حملے میں تئیس سیکیورٹی اہلکاروں کی شہادت ہوئی۔
دفتر خارجہ کے مطابق افغان ناظم الامور سے کہا گیا کہ وہ فوری طور پر افغان عبوری حکومت کو آگاہ کریں کہ حالیہ حملے کے مرتکب افراد کے خلاف مکمل تحقیقات اور سخت کارروائی کی جائے۔ پاکستان نے مطالبہ کیا کہ افغان حکومت اعلی سطح پر دہشت گردی کے واقعے کی عوامی سطح پر مذمت کرے اور تمام دہشت گرد گروہوں، ان کی قیادت، اور ان کی پناہ گاہوں کے خلاف فوری طور پر قابل تصدیق کارروائیاں کریں۔
