paksahafat پاک صحافت
Related Articles
اسلام آباد (پاک صحافت) 90 فیصد سے زائد عوام کا ماننا ہے کہ ملک میں سب سے زیادہ مہنگائی پاکستان تحریک انصاف (پی ٹی آئی) کی حکومت میں ہوئی۔ اس کے علاوہ 85.9 فیصد عوام وفاقی حکومت کی خود احتسابی کے عمل سے غیر مطمئن ہیں۔ عوام کا ماننا ہے کہ وفاقی حکومت کی خود احتسابی غیر تسلی بخش ہے۔
تفصیلات کے مطابق نیشنل کرپشن پرسیپشن سروے 2021 کے نتائج کے مطابق 92.9 فیصد پاکستانی ’ پاکستان تحریک انصاف ( پی ٹی آئی) حکومت (2018-2021) میں مہنگائی اور قیمتوں میں اضافے کو سب سے زیادہ سمجھتے ہیں، سروے کے مطابق مسلم لیگ ن کی حکومت (2013 سے 2018) میں یہ شرح 4.6 فیصد تھی جبکہ پاکستان پیپلز پارٹی (پی پی پی) کی حکومت (2008-2013) میں مہنگائی کی شرح 2.5 فیصد تھی‘۔
واضح رہے کہ جب مہنگائی اور بے روزگاری کی وجوہات کے بارے میں عوام سے پوچھا گیا تو 50.6 فیصد لوگوں نے حکومتی نااہلی، 23.3 فیصد نے کرپشن، 16.6 فیصد نے پالیسی پر عمل درآمد نہ ہونے اور 9.6 فیصد نے حکومتی معاملات میں سیاستدانوں کی بےجا مداخلت کو ذمہ دار ٹھہرایا۔ خیال رہے کہ رواں سال جنوری میں ٹرانسپیرنسی انٹرنیشنل کے جاری کردہ کرپشن پرسیپشن انڈیکس (سی پی آئی) میں پاکستان 180 ممالک میں سے 124ویں نمبر پر ہے، جو پچھلے سال کے مقابلے میں چار درجے کمی ہے۔
