paksahafat پاک صحافت
Related Articles
اسلام آباد (پا ک صحافت) وزیر اعظم شہباز شریف نے سانحہ آرمی پبلک اسکول پشاور پر جاری پیغام میں کہا ہے کہ 16 دسمبر دہشتگردی کے خلاف پورے پاکستان کے ایک آواز ہونے کا دن ہے۔ وزیر اعظم کا کہنا ہے کہ ہر سال 16 دسمبر کا دن پوری قوم کو اس کرب اور دکھ کی یاد دلاتا ہے جب دہشتگردوں نے آرمی پبلک اسکول پشاور میں ظلم کی داستان رقم کی۔
تفصیلات کے مطابق سانحہ اے پی سی پر وزیر اعظم شہباز شریف نے ٹوئٹر پر ایک پیغام جاری کیا ہے جس میں انہوں نے کہا کہ برسوں بعد بھی غم ہے کہ بھلایا نہیں جاتا، آج سانحہ آرمی پبلک اسکول کے شہداء سے عقیدت اور ان کے لواحقین کا غم بانٹنےکا دن ہے، پاکستانی قوم اپنےشہیدوں کی قربانیاں کبھی فراموش نہیں کرے گی۔
واضح رہے کہ جاری پیغام میں وزیر اعظم شہباز شریف نے مزید کہا کہ یہ دن پوری دنیا کے لیے پیغام ہے کہ پاکستان نے دہشتگردی کے خاتمے کے لیے عظیم قربانیاں دی ہیں، ہماری یہ جدوجہد جاری ہے جو اس عفریت کے مکمل خاتمے تک اسی آہنی ارادے اور ثابت قدمی سے جاری رہے گی۔
