paksahafat پاک صحافت
Related Articles
اسلام آباد (پاک صحافت) پی پی رہنما سید نیئر بخاری نے کہا ہے کہ پیپلزپارٹی اپوزیشن جماعتوں کے اتحاد پاکستان ڈیموکریٹک موومنٹ کو برقرار رکھنے میں اپنا بھرپور کردار ادا کرے گی۔ انہوں نے جلد پی ڈی ایم کا سربراہی اجلاس بلانے کی تجویز بھی دی ہے۔
تفصیلات کے مطابق پیپلزپارٹی کے سیکریٹری جنرل سید نیئر بخاری نے کہا ہے کہ کسی ایک شخص یا جماعت کی خواہش سے پی ڈی ایم میں شامل کسی جماعت کو اس سے نکالا نہیں جاسکتا۔ ہماری جماعت اس اتحاد کو قائم رکھنے میں بھرپور کردار ادا کرے گی۔ اتحاد میں شامل دس جماعتیں مل کر جو فیصلہ کریں گی اسی کے سب پابند ہیں جبکہ انفرادی فیصلوں کی کوئی حیثیت نہیں ہے۔
سید نیئر بخاری کا مزید کہنا ہے کہ پی ڈی ایم کی بنیاد ہی پیپلزپارٹی کی زیر اہتمام اے پی سی میں رکھی گئی تھی۔ مسائل و معاملات درپیش آتے ہیں اور ان کا حل بھی موجود رہتا ہے۔ پی ڈی ایم میں دس جماعتیں شامل ہیں۔ تمام معاملات کو زیر غور لانے کے لئے پی ڈی ایم کا سربراہی اجلاس بلایا جائے۔
