لاہور (پاک صحافت) گزشتہ روز وفات پانے والے پاکستان کے سینئر اور معروف صحافی عارف نظامی کو آج لاہور میں سپرد خاک کردیا گیا ہے۔
تفصیلات کے مطابق پاکستان کے معروف صحافی عارف نظامی کی نماز جنازہ جامع مسجد اللّٰہ اکبر ڈیفنس ای بلاک میں ادا کی گئی، جس کے بعد انہیں لاہور کے میانی صاحب قبرستان میں سپرد خاک کیا گیا ہے۔ ان کی نماز جنازہ میں صحافیوں سمیت سیاسی و سماجی شخصیات نے بھی شرکت کی۔
یاد رہے کہ معروف صحافی عارف نظامی عارضہ قلب میں مبتلا تھے جبکہ گزشتہ دو ہفتوں سے لاہور کے نجی اسپتال میں ان کا علاج چل رہا تھا۔ گزشتہ روز وہ اپنے خالق حقیقی سے جاملے تھے۔ معروف صحافی کی وفات پر اعلی حکام، صحافی برادری سمیت سیاسی و سماجی رہنماوں کی جانب سے افسوس کا اظہار کیا گیا ہے۔