paksahafat پاک صحافت
Related Articles
لندن (پاک صحافت) پاکستان مسلم لیگ ن کے قائد اور سابق وزیر اعظم نواز شریف نے ویزیر اعظم عمران خان اور ان کے ساتھیوں کو عبرتناک سزا دینے کا مطالبہ کرتے ہوئے کہا ہے کہ الیکشن میں دھاندلی کے تمام مجرموں کو عبرتناک سزا دے کر آئینی ذمہ داری پوری کی جائے۔
تفصیلات کے مطابق لندن سے جاری بیان میں سابق وزیر اعظم میاں نواز شریف نے کہا ہے کہ الیکشن کمیشن کی انکوائری رپورٹ نے ثابت کر دیا کہ ڈسکہ میں عمران خان اور حواریوں نے کس طرح الیکشن چوری کیا اور عوام کے حق پر ڈاکا ڈالا۔ انہوں نے سوال اٹھاتے ہوئے کہا کہ 2018 میں RTS کیونکر بند کیا گیا، اس رپورٹ کے آنے کے بعد کیا کوئی شک و شبہ باقی رہ گیا ہے؟
واضح رہے کہ اس سے قبل پاکستان مسلم لیگ ن کے صدر شہباز شریف نے بھی ڈسکہ الیکشن کی رپورٹ سے متعلق ایک بیان میں کہا تھا کہ ووٹ چوری ثابت ہو چکی، عمران نیازی بتائیں اب کس چیز کا انتظار ہے؟ عمران نیازی صاحب طاقتور ہیں، لائیں خود کو قانون کے نیچے؟ شریف کا کہنا ہے کہ عوام کے سرمائے کی طرح لوگوں کے ووٹ اور اپنے نمائندے منتخب کرنے کا اختیار بھی لوٹنے اور چھیننے کی کوشش ہو رہی ہے۔
