paksahafat پاک صحافت
Related Articles
اسلام آباد (پاک صحافت) شہباز شریف کا کہنا ہے کہ نااہل و سلیکٹڈ عمران خان اور اس کی نالائق حکومت نے ملک میں جو تباہی اور بربادی پھیلائی ہے اس کی مثال ستر سالہ تاریخ میں کہیں نہیں ملتی۔
تفصیلات کے مطابق مسلم لیگ ن کے صدر اور قومی اسمبلی میں اپوزیشن لیڈر شہباز شریف نے ذرائع ابلاغ کے نمائندوں سے گفتگو کرتے ہوئے کہا ہے کہ آج تمام جماعتوں نے ریکویزیشن اور تحریک عدم اعتماد کے حوالے سے اپنے اراکین سے دستخط لیے اور آج ہم نے اس کو جمع کرا دیا ہے۔
شہباز شریف کا مزید کہنا تھا کہ مہنگائی تاریخ کی بلند ترین سطح پر ہے، بے روزگاری بڑھ رہی ہے، قرضے لے کر ملک کے 22 کروڑ عوام اور ہماری نسلوں کو گروی رکھ دیا گیا ہے اور ان کھربوں کے عوض بھی اس ملک میں ایک بھی نئی اینٹ لگی ہوئی نظر نہیں آتی۔ انہوں نے کہا کہ ہم نے یہ فیصلہ اپنی ذات کے لیے نہیں بلکہ پاکستان کے 22 کروڑ عوام کی خواہش پر کیا جو اس حکومت کے خلاف دست با دعا ہے لہٰذا اس کو غیرملکی سازش قرار دینا احمقانہ بات اور بے بنیاد الزام ہے۔
