paksahafat پاک صحافت
Related Articles
اسلام آباد (پاک صحافت) حنا ربانی کھر کا کہنا ہے کہ خطے میں موجود دہشت گردانہ تنظیموں کو بھارت کی معاونت حاصل ہے۔
تفصیلات کے مطابق وزیر مملکت برائے خارجہ حنا ربانی کھر نے ذرائع ابلاغ کے نمائندوں سے گفتگو کرتے ہوئے کہا ہے کہ آج دنیا اور خطے کو مختلف چیلنجز کا سامنا ہے، افسوس ہے کہ آج ایسے معاملے پر بات کرنے آئی ہوں، افسوس، دہشتگردی کرانے والا خود کو دہشتگردی کا سب سے بڑا شکار قرار دیتا ہے۔ وزیر مملکت نے کہا کہ صبح سیکرٹری خارجہ نے غیرملکی سفیروں کو بھارت کے دہشتگردی میں ملوث ہونے کے بارے میں بریفنگ دی، واضح ثبوت ہیں کہ بھارت پاکستان میں دہشتگردی میں ملوث ہے۔
حنا ربانی کھر کا مزید کہنا تھا کہ بھارت سے زیادہ کسی نے دہشتگردی کا فائدہ نہیں اٹھایا اور پاکستان وہ ملک ہے جو دہشتگردی کا سب سے بڑا شکار رہا ہے، اگر آپ پڑوسیوں کے گھر میں آگ لگانے کی کوشش کریں گے تو آگ آپ کے گھر بھی آئے گی، بھارت نے عالمی سطح پر انسداد دہشتگردی کے لیے کوئی کردار ادا نہیں کیا۔ انہوں نے کہا کہ بھارت مقبوضہ کشمیر میں مسلسل انسانی حقوق کی خلاف ورزیوں کا مرتکب ہے، بھارت خطے میں دہشتگردی کی متعدد تنظیموں کی معاونت و مدد کرتا رہا ہے، بھارت کو اس پالیسی سے پیچھے ہٹنا ہوگا۔
