paksahafat پاک صحافت
Related Articles
پاک صحافت فوری جنگ بندی کا مطالبہ کرتے ہوئے امریکی نائب صدر کملا ہیرس نے اسرائیل پر تنقید کی ہے کہ وہ غزہ میں انسانی تباہی کو کم کرنے کے لیے خاطر خواہ اقدامات نہیں کر رہا۔
امریکی نائب صدر ہیرس نے کہا ہے کہ غزہ میں لوگ بھوک سے مر رہے ہیں اس لیے صیہونی حکومت غزہ کو امدادی سامان کی فراہمی میں رکاوٹ نہ ڈالے۔
کملا ہیرث نے کہا کہ غزہ میں کم از کم چھ ہفتوں کی جنگ بندی ہونی چاہیے تاکہ اسرائیلی یرغمالیوں کو وہاں سے نکالا جا سکے۔ بہت سے سیاسی مبصرین نے غزہ میں امریکی امداد کی کمی اور کملا ہیرل کے جنگ بندی کے بیان کو مگرمچھ کے آنسو قرار دیا ہے۔
7 اکتوبر کے بعد غزہ میں شروع ہونے والی جنگ میں امریکہ نے نہ صرف اسرائیل کو اسلحہ اور فوجی امداد فراہم کی ہے بلکہ سلامتی کونسل میں جنگ بندی کی ہر کوشش کو بھی ناکام بنایا ہے۔
پانچ ماہ بعد جب 30 ہزار سے زائد فلسطینی شہید ہوچکے ہیں جن میں زیادہ تعداد بچوں اور خواتین کی ہے اور لوگ بھوک سے مرنے لگے ہیں، دنیا بھر میں بڑھتے ہوئے احتجاج کے پیش نظر امریکا ایک بار پھر اسرائیل کو بچانے کے لیے آگے آیا ہے۔
لیکن دلچسپ بات یہ ہے کہ امریکی نائب صدر ابھی تک صرف 6 ہفتوں کے لیے عارضی جنگ بندی کی بات کر رہے ہیں، تاکہ اس عرصے کے دوران اسرائیلی یرغمالیوں کو رہا کیا جا سکے۔ ایسا لگتا ہے کہ وہ اب بھی غزہ میں اسرائیلی نسل کشی اور غذائی قلت کا شکار ہونے والے فلسطینی بچوں سے زیادہ اسرائیلی یرغمالیوں کی آزادی کی فکر میں ہے۔
تاہم اس سے قبل صیہونی حکومت نے مصر میں جنگ بندی پر مذاکرات کے لیے ہونے والے اجلاس میں شرکت سے انکار کر دیا تھا۔ صہیونی حکام کا کہنا تھا کہ حماس ابھی تک زندہ بچ جانے والے یرغمالیوں کی فہرست فراہم نہیں کر رہی ہے۔
حماس کا کہنا ہے کہ صہیونی فوج کی مسلسل بمباری کی وجہ سے وہ ایسا کرنے کے قابل نہیں ہے۔ حماس کے ایک اعلیٰ عہدیدار باسم نعیم نے کہا کہ عملی طور پر یہ معلوم کرنا مشکل ہے کہ کون زندہ ہے اور کون نہیں۔
جمعرات کو اسرائیلی فوجیوں نے غزہ کی پٹی میں امدادی سامان لینے کے لیے لائن میں کھڑے لوگوں پر اندھا دھند فائرنگ کی جس میں 115 افراد شہید ہو گئے۔ عالمی سطح پر اس واقعے پر شدید تنقید اور غزہ میں جنگ بندی کے لیے دباؤ بڑھنے کے بعد ہی کملا ہیرس نے عارضی جنگ بندی کا مطالبہ کیا ہے۔
