paksahafat پاک صحافت
Related Articles
کیلیفورینا (پاک صحافت) سماجی رابطوں کی مقبول ترین ویب سائٹ ٹوئٹر نے صارفین کی تصدیق کے حوالے سے بھیجی جانے والی درخواستوں کو مسترد کرنے پر وضاحتی بیان جاری کیا ہے۔ ٹوئٹر کا کہنا ہےکہ فیصلہ کن ای میلز کے تحت آپ کو یہ سمجھنے میں مزید آسانی ہوجائے گی کہ آپ کی درخواستیں کیوں ہمارے معیار پر پورا نہیں اتر رہیں، انہیں دیکھ کر آپ 30 دن بعد دوبارہ اپلائی کرسکتے ہیں۔
تفصیلات کے مطابق ٹوئٹر نے اپنے اکاؤنٹ سے جاری بیان میں کہا کہ ہمیں صارفین کی جانب سے شکایات موصول ہوئی تھیں کہ ہمیں واضح طور پر بتانا چاہیے کہ بلیو ٹک یعنی صارفین کے اکاؤنٹس کی تصدیق کیلئے بھیجی جانے والی درخواستیں کیوں مسترد کی جارہی ہیں؟ اس حوالے سے ایپ کے پراڈکٹ مینیجر بی بائرن کا کہنا ہے کہ کچھ ای میل لوگوں کیلئے کنفیوژن پیدا کرنے والی تھیں تاہم تصدیق کیلئے ای میلز کے ذریعے بہتر معلومات فراہم کرنا ہماری کمپنی کی اولین ترجیح ہے۔
واضح رہے کہ ٹوئٹر نے صارفین کیلئے تصدیق کے عمل کا آغاز رواں سال مئی سے دوبارہ کردیا تھا۔ اس سے قبل نومبر2017 میں صارفین کی تصدیق کے سلسلے کو کڑی تنقید کے باعث بند کیا گیا تھا۔ ٹوئٹر حکام نے واضح کیا تھا کہ تصدیق کے لیے اکاؤنٹ ہولڈر کی پروفائل پکچر اور درست ای میل ایڈریس یا فون نمبر درکار ہوگا۔حکام کا کہنا تھا کہ ضروری معلومات کے ساتھ اکاؤنٹ کی تصدیق کے لیے یہ شرط بھی رکھی گئی ہے کہ صارف اکاؤنٹ پر 6 ماہ کے دوران فعال رہا ہو۔
