paksahafat پاک صحافت
Related Articles
اسلام آباد (پاک صحافت) وزیرِ خارجہ بلاول بھٹو زرداری نے کہا ہے کہ پاکستان میں مذہب اور عقیدے کی بنیاد پر کسی طرح کے امتیازی سلوک کی کوئی گنجائش نہیں۔ بلاول بھٹو زرداری نے اقلیتوں کے قومی دن پر پیغام دیتے ہوئے کہا کہ غیرمسلم شہری بھی ملک کے برابر کے شہری ہیں، 1973ع کا آئین تمام اقلیتوں کو یکساں حقوق کی ضمانت دیتا ہے۔
تفصیلات کے مطابق وزیر خارجہ نے کہا کہ انتہا پسندی ایک بین الاقوامی مسئلہ ہے، جس کا سدباب بھی عالمی برادری کے فراخدلانہ و بے لوث تعاون کے بغیر ممکن نہیں۔ وزیرِ خارجہ نے کہا کہ حکومت پاکستان تمام شہریوں کو برابر سمجھتی ہے، آئین کی رو سے پاکستان میں مذہب اور عقیدے کی بنیاد پر کسی طرح کے امتیازی سلوک کی کوئی گنجائش نہیں۔
واضح رہے کہ بلاول بھٹو نے کہا کہ نظریہ پاکستان کی حقیقی و واحد وارث پاکستان پیپلز پارٹی ہے، نظریہ پاکستان کی اساس مذہبی آزادی، مساوات اور سماجی انصاف ہے۔ پی پی پی چیئرمین کا کہنا ہے کہ اقلیتوں کو پارلیمنٹ، بیوروکریسی اور زندگی کے دیگر تمام شعبہ ہائے زندگی میں نمائندگی کے لیے پی پی پی نے بے شمار بنیادی و نتیجہ خیز اقدامات کیے ہیں۔
