paksahafat پاک صحافت
Related Articles
راولپنڈی (پاک صحافت) مسجد نبوی صلی اللہ علیہ و سلم کی توہین اور پاکستانی حکومتی وفد کے ساتھ مسجد نبوی میں بدتمیزی کرنے پر شیخ رشید کے بھتیجے کا جسمانی ریمانڈ لینے کی منظوری دے دی گئی ہے۔
تفصیلات کے مطابق شیخ رشید کے بھتیجے راشد شفیق کو مسجد نبوی کے معاملے پر اشتعال انگیز ویڈیو پر گرفتار کیا گیا ہے۔ شیخ رشید نے کہا وہ بھتیجے کی رہائی کی بھیک نہیں مانگیں گے، خود بھی گرفتاری کے لیے تیار ہیں۔ شیخ راشد شفیق عمرے کی ادائیگی کے بعد نجی ایئر لائن کی پرواز سے اسلام آباد پہنچے تھے کہ انہیں اسلام آباد ایئر پورٹ پر گرفتار کرلیا گیا تھا۔
ذرائع کے مطابق شیخ راشد شفیق کے خلاف فیصل آباد میں مقدمہ درج کیا گیا تھا۔ مقدمے میں چیئرمین پی ٹی آئی عمران خان، فواد چوہدری، شہباز گِل، انیل مسرت، نبیل مسرت، جہانگیر چیکو، رانا عبدالستار، عامر الیاس بھی ملزم نامزد ہیں۔ مقدمہ 15 معلوم اور 100 سے 150 نامعلوم ملزمان کے خلاف درج کیا گیا تھا۔
