paksahafat پاک صحافت
Related Articles
لاہور (پاک صحافت) عطا تارڑ کا کہنا ہے کہ حمزہ شہباز وزیراعلی کے الیکشن میں 179 ووٹ لے کر بھاری اکثریت سے وزیراعلی پنجاب منتخب ہوئے ہیں۔
تفصیلات کے مطابق وزیر داخلہ پنجاب عطا تارڑ نے نیوز کانفرنس سے خطاب کرتے ہوئے کہا ہے کہ وزیراعلیٰ پنجاب کے انتخاب میں معاملہ 2 چٹھیوں کا ہے، ایک جو عمران خان نےاپنے ارکان کو لکھی اور دوسری جو چودھری شجاعت نے اپنے ارکان کو لکھی۔ یہاں پر عمران خان کا ایک خط موجود ہے جس میں وہ اپنے پارٹی ارکان کو ہدایت کر رہے ہیں کہ پرویز الہی کو ووٹ ڈالا جائے، عمران خان نے یہ ہدایت بطور پارٹی سربراہ کے جاری کی۔
عطا تارڑ کا مزید کہنا تھا کہ دوسری چٹھی جو چودھری شجاعت حسین نے اپنے 10 ارکان کو لکھی تھی اس میں ہدایت دی گئی کہ وزیراعلیٰ پنجاب کے انتخاب میں پرویز الٰہی کی بجائے حمزہ شہباز کو ووٹ دیں۔ اب یہ سمجھ سے بالاتر ہے کہ ان 2 چٹھیوں کا موازنہ کریں تو عمران خان کی چٹھی زیادہ محترم ٹھہرتی ہے، آئین و قانون کے تحت ان کی چٹھی پر عملدرآمد کرتے ہوئے مسلم لیگ (ن) کے امیدوار حمزہ شہباز کے 25 ووٹ گنتی میں شمار نہیں کئے جاتے اور ضمنی الیکشن کرائے جاتے ہیں۔
