paksahafat پاک صحافت
Related Articles
اسلام آباد (پاک صحافت) عام انتخابات کے نتائج مکمل ہونے کو ہیں اور اس بار زبردست اپ سیٹس دیکھنے کو ملے ہیں، کہاں روایتی سیاستدان آزاد امیدواروں سے شکست کھا چکے ہیں۔
تفصیلات کے مطابق قومی اسمبلی کے حلقہ این اے 54 راولپنڈی تھری سے آزاد امیدوار عقیل ملک 85 ہزار 912 ووٹ لے کر کامیاب قرار پائے ہیں۔ عقیل ملک نے چوہدری نثار علی خان اور غلام سرور خان جیسے گھاگ سیاستدانوں کو شکست دی ہے۔
چوہدری نثار این اے 54 سے آزاد حیثیت میں جبکہ غلام سرور استحکام پاکستان پارٹی کے ٹکٹ پر کھڑے ہوئے تھے۔ دلچسپ بات یہ ہے کہ عقیل ملک کو ن لیگ نے ٹکٹ دینے سے انکار کردیا تھا۔ لیکن یہ واحد بڑا اپ سیٹ نہیں جس میں کسی آزاد امیدوار نے نامور سیاستدان کو ہرایا ہو۔
مانسہرہ این اے 15 میں مسلم لیگ ن کے قائد نواز شریف آزاد امیدوار شہزادہ گستاسپ خان سے ہارے۔ مولانا فضل الرحمان ڈیرہ اسماعیل خان کے آبائی حلقے این اے 44 میں علی امین گنڈا پور سے ہارے جو کہ پی ٹی آئی کے حمایت یافتی آزاد امیدوار تھے۔
این اے 122 لاہور میں خواجہ سعد رفیق پی ٹی آئی کے حمایت یافتہ لطیف کھوسہ سے ہار گئے۔ این اے 2 مالاکنڈ پر مسلم لیگ (ن) کے امیر مقام کو آزاد امیدوار امجد خان سے شکست ہوئی۔ این اے 115 شیخوپورہ سے اہم لیگی رہنما جاوید لطیف آزاد امیدوار خرم شہزاد سے ہارے۔
این اے148 ملتان میں یوسف رضا گیلانی آزاد امیدوار بیرسٹر تیمور الطاف سے ہارے۔
