paksahafat پاک صحافت
Related Articles
اسلام آباد (پاک صحافت) ترجمان دفتر خارجہ کا کہنا ہے کہ افغان وزیر خارجہ امیر خان متقی جمعہ کو پاکستان آئیں گے۔
تفصیلات کے مطابق دفتر خارجہ کی ترجمان ممتاز زہرہ بلوچ کی جانب سے بتایا گیا کہ افغان وزیر خارجہ ایک اعلی سطحی وفد کی قیادت کریں گے جس میں افغانستان کے قائم مقام وزیر تجارت و صنعت حاجی نورالدین عزیزی کے علاوہ افغانستان کی خارجہ امور، ٹرانسپورٹ اور تجارت کی وزارتوں کے اعلی حکام شامل ہیں۔
ترجمان کے مطابق دو طرفہ ملاقاتوں کے علاوہ قائم مقام افغان وزیر خارجہ 6 مئی کو 5ویں چین، پاکستان، افغانستان سہ فریقی وزراء خارجہ مذاکرات میں بھی شرکت کریں گے، چینی سٹیٹ قونصلر اور وزیر خارجہ کن گینگ بھی سہ فریقی وزراء خارجہ مذاکرات میں شرکت کریں گے۔
ممتاز زہرہ بلوچ کے مطابق قائم مقام افغان وزیر خارجہ کا دورہ افغانستان کے ساتھ پاکستان کی سیاسی رابطے کے عمل کا تسلسل ہے جس میں 29 نومبر 2022 کو پاکستان کی وزیر مملکت برائے خارجہ امور کا دورہ کابل اور ایک اعلی سطحی وفد کا دورہ بھی شامل ہے۔
ترجمان نے کہا کہ پاکستان کے وزیر دفاع 22 فروری کو کابل کا دورہ کیا۔ افغانستان کے قائم مقام وزیر خارجہ کے دورے کے دوران فریقین پاکستان اور افغانستان کے درمیان سیاسی، اقتصادی، تجارتی، روابط، امن و سلامتی اور تعلیم کے شعبوں میں دوطرفہ تعلقات کے تمام شعبوں کا جائزہ لیں گے۔
