paksahafat پاک صحافت
Related Articles
یمن کی نیشنل سالویشن حکومت کے وزیر خارجہ ہشام شرف عبداللہ نے ریاض اور ابو ظہبی کو شدید دھمکی دیتے ہوئے کہا ہے کہ یمن کے محاصرے کی پالیسی کو اگر ترک نہیں کیا گیا تو پھر ان کی بندرگاہیں بھی محفوظ نہیں رہیں گی اور ہم ریاض اور ابو ظہبی پر حملہ کرنے میں دیر نہیں لگائیں گے۔
ہشام شرف عبداللہ نے ملت یمن کے دشمن ملکوں کی بندرگاہوں کو نشانہ بنائے جانے پر زور دیا ہے، ان کا کہنا ہے کہ ریاض اور ابوظہبی سے کسی قسم کی انسان دوستانہ اقدامات کے سلسلے میں آس لگانے کا کوئی فائدہ نہیں ہے۔
نیشنل سالویشن حکومت کے وزیر خارجہ نے یمن کے آئل ٹینکروں کو روکے جانے کی بنا پر سعودی اتحاد پر کڑی تنقید کی اور کہا کہ سعودی عرب اور متحدہ عرب امارات یمن میں انسان دوستانہ اقدامات کی حمایت کے دعووں کے باوجود قحط اور بھوک مری کو عام کر رہے ہیں۔
انہوں نے کہا کہ سعودی عرب اور متحدہ عرب امارات الحدیدہ کے ساحل پر بعض اوقات بحری جہازوں کو لنگر انداز ہونے کی اجازت دیتے ہیں تاہم اس کا بنیادی ہدف عالمی رائے عامہ کو گمراہ کرنا ہوتا ہے۔
ہشام شرف عبداللہ نے خبردار کیا کہ اگر جارح ملکوں نے یمن کا محاصرہ ختم نہیں کیا تو پھر صنعا کی حکومت بھی ہاتھ ہاتھ پر
دھرے نہیں بیٹھے گی اور جارح ملکوں کی بندرگاہوں کو بھی غیر محفوظ بنا دیا جائے گا۔
واضح رہے کہ سعودی عرب نے امریکہ، متحدہ عرب امارات اور بعض دوسرے ملکوں کے ساتھ ملک کر مارچ دو ہزار پندرہ سے یمن کو جارحیت کا نشانہ بنا رکھا ہے، یمن پر سعودی عرب اور اس کے اتحادیوں کے وحشیانہ حملوں میں اب تک لاکھوں افراد ہلاک اور زخمی ہوچکے ہیں جبکہ کئی لاکھ یمنیوں کو اپنا گھر بار چھوڑنے پر مجبور ہونا پڑا ہے۔
