paksahafat پاک صحافت
Related Articles
پاک صحافت ہندوستان کے وزیر خارجہ ایس جے شنکر نے کہا ہے کہ ہندوستان چین کی طرف سے لائن آف ایکچوئل کنٹرول (ایل اے سی) کو یکطرفہ طور پر تبدیل کرنے کی کسی بھی کوشش سے اتفاق نہیں کرے گا۔
انہوں نے اس بات پر زور دیا کہ بیجنگ کے ساتھ نئی دہلی کے تعلقات “معمول کے نہیں” ہیں اور بنیادی مسائل پر کوئی سمجھوتہ نہیں کیا جائے گا۔
پاکستان پر بالواسطہ حملہ کرتے ہوئے جے شنکر نے یہ بھی کہا کہ دہشت گردی کو ہندوستان کو مذاکرات کی میز پر لانے کے لیے ایک آلے کے طور پر استعمال کرنے کی اجازت نہیں دی جا سکتی۔
انہوں نے کہا کہ ہندوستان کو اپنی سرحدوں پر چیلنجوں کا سامنا ہے، جو کہ کوویڈ کے دور میں شدید ہو گئے ہیں۔
انہوں نے کہا کہ آج چین کے ساتھ ہمارے تعلقات کی حالت زیادہ نارمل نہیں ہے کیونکہ ہم لائن آف ایکچول کنٹرول کو یکطرفہ طور پر تبدیل کرنے کی کسی بھی کوشش سے کبھی اتفاق نہیں کریں گے۔
جے شنکر نے اپنی تقریر میں کہا کہ کسی بھی ملک کو دہشت گردی سے اتنا نقصان نہیں پہنچا جتنا ہندوستان۔
انہوں نے کسی ملک کا نام لیے بغیر کہا کہ ہم سب کے ساتھ اچھے ہمسائیگی والے تعلقات چاہتے ہیں لیکن اچھے ہمسائیگی کے تعلقات کا مطلب یہ نہیں کہ دہشت گردی کے معاملے کو پس پشت ڈال دیا جائے۔ ہم بہت واضح ہیں۔ جے شنکر نے کہا کہ قومی سلامتی کے میدان میں مودی حکومت کی پالیسیوں اور کارکردگی سے یہ بالکل واضح ہے کہ بنیادی مسائل پر کوئی سمجھوتہ نہیں کیا جائے گا۔
انہوں نے کہا کہ میں کہہ سکتا ہوں کہ اس وقت دنیا کو ہندوستان سے بہت سی توقعات وابستہ ہیں۔ کیونکہ آج ہمیں ایک مضبوط معیشت کے طور پر دیکھا جاتا ہے، ایک ایسے ملک کے طور پر جو دنیا کو درپیش مسائل کو حل کرنے میں اپنا کردار ادا کرے گا۔
واضح رہے کہ بھارتی فوج کے مطابق 9 دسمبر کو اروناچل پردیش کے توانگ سیکٹر میں ایل اے سی پر بھارتی اور چینی فوجیوں کے درمیان جھڑپ ہوئی تھی جس میں ‘دونوں اطراف کے کچھ اہلکار معمولی زخمی ہوئے تھے’۔ جون 2020 میں وادی گالوان میں شدید جھڑپ کے بعد ہندوستانی اور چینی فوجیوں کے درمیان یہ پہلی بڑی جھڑپ تھی۔ سرحدی تعطل کے حل کے لیے دونوں فریقین کے درمیان بات چیت کے 17 دور ہو چکے ہیں جن کا کوئی خاطر خواہ نتیجہ نہیں نکلا۔
