paksahafat پاک صحافت
Related Articles
نئی دہلی {پاک صحافت} بھارتی سپریم کورٹ نے اترپردیش کے وارانسی میں گیانواپی مسجد پر جاری تنازعہ کیس کی سماعت جمعہ تک ملتوی کر دی ہے۔ اس کے ساتھ ہی عدالت نے وارانسی کی عدالت کو ہدایت دی ہے کہ وہ کل تک اس معاملے سے متعلق کوئی حکم جاری نہ کرے۔
موصولہ رپورٹ کے مطابق بھارت کی سب سے بڑی ریاست اتر پردیش کے شہر وارانسی میں واقع گیانواپی مسجد سے متعلق تنازعہ نے جمعرات کو اس وقت نیا موڑ اختیار کر لیا جب ہندو فریق نے سپریم کورٹ سے معاملے کی سماعت جمعہ تک ملتوی کرنے کا مطالبہ کیا۔ ہندو فریق کے وکیل وشنو جین نے کہا کہ مرکزی وکیل ہری شنکر جین کو دل کا دورہ پڑا ہے، اس لیے سماعت جمعہ تک ملتوی کی جائے۔ تاہم مسلم فریق کی جانب سے حذیفہ احمدی نے کہا کہ اس کیس کی وجہ سے دیگر مقامات پر بھی اسی طرح کے مقدمات درج کیے جارہے ہیں۔ ایسے میں ہمارا مطالبہ ہے کہ معاملے کی سماعت میں تاخیر نہ کی جائے۔ انہوں نے سپریم کورٹ کو بتایا کہ ہندو فریق کی جانب سے وارانسی کورٹ میں درخواست دائر کی گئی ہے کہ مسجد کی دیوار کو گرایا جائے۔ چونکہ ٹرائل کورٹ کی کارروائی جاری رہے گی، اس لیے ہمیں خدشہ ہے کہ وہ اس سلسلے میں کوئی حکم دے سکتی ہے۔
دریں اثنا، جسٹس ڈی وائی چندر چوڑ، جسٹس سوریہ کانت اور جسٹس پی ایس نرسمہا کی بنچ نے گیانواپی مسجد کیس کی سماعت کرتے ہوئے ٹرائل کورٹ کی کارروائی پر جمعہ تک روک لگا دی ہے۔ اس کے ساتھ ہی سپریم کورٹ میں سماعت بھی جمعہ تک ملتوی کر دی گئی ہے۔ اب سپریم کورٹ میں جمعہ کو سہ پہر تین بجے دوبارہ سماعت ہوگی۔ تاہم، منگل کو گیانواپی مسجد کیس کی سماعت کرتے ہوئے، سپریم کورٹ نے وارانسی کے ڈی ایم کو حکم دیا تھا کہ وہ اس بات کو یقینی بنائیں کہ اس جگہ کو محفوظ کیا جائے جہاں مبینہ طور پر شیولنگ پایا گیا تھا۔ لیکن ایسا کرتے ہوئے اس بات کا بھی خیال رکھا جائے کہ امت مسلمہ کو نماز پڑھنے میں کسی قسم کی پریشانی کا سامنا نہ کرنا پڑے۔
