paksahafat پاک صحافت
Related Articles
پاک صحافت خطے میں عروج پر پہنچ جانے والی کشیدگی کو کم کرنے کے لیے یوکرین اور روس کے سینیئر حکام پیرس میں ایک اجلاس کے لیے جمع ہوئے جب کہ امریکا نے روس کو یوکرین پر حملے کی صورت میں سخت پابندیوں سے خبردار کیا ہے۔
روسی ڈپٹی چیف آف سٹاف دمتری کوزاک اور یوکرین کے سینئر صدارتی مشیر آندرے یرماک نے جرمن حکام کی موجودگی میں ملاقات کی۔ اس ملاقات کو کشیدگی کو کم کرنے کی کوشش کے طور پر دیکھا جا رہا ہے۔
فرانسیسی صدر ایمانوئل میکرون کے قریبی ساتھی نے میڈیا کو بتایا کہ یہ بہت حوصلہ افزا ہے کہ روس نے سفارتی محاذ پر بات چیت دوبارہ شروع کرنے پر رضامندی ظاہر کی ہے۔
دوسری جانب امریکا نے ایک بار پھر اشتعال انگیز بیان دیتے ہوئے روسی صدر ولادی میر پیوٹن کو خبردار کیا ہے کہ اگر روس نے یوکرین پر حملہ کرنے کی غلطی کی تو اسے اس کے سنگین نتائج بھگتنا پڑ سکتے ہیں اور اس سے پوری دنیا بدل جائے گی۔ انہوں نے دھمکی دی کہ وہ روس کو ٹیکنالوجی کی برآمد بند کر دیں گے اور روسی صدر ولادیمیر پوتن پر پابندیاں عائد کر دیں گے۔
کریملن ہاؤس کے ترجمان دمتری پیسکوف نے دھمکیوں کو مسترد کرتے ہوئے کہا کہ اس طرح کی پابندیاں یوکرین کے تناظر میں کشیدگی کو کم کرنے کی سفارتی کوششوں کے لیے بہت بڑا دھچکا ثابت ہوں گی۔ انہوں نے کہا کہ یہ سیاسی طور پر تکلیف دہ نہیں بلکہ تباہ کن ہوگا۔
کریملن ہاؤس نے کہا کہ کوئی بھی پابندیاں، خاص طور پر روسی صدر ولادیمیر پوٹن پر، سرخ لکیر کو عبور کرنے اور دو طرفہ تعلقات کو ختم کرنے کے مترادف ہوں گی۔
پیرس میں ہونے والے مذاکرات موجودہ حالات میں انتہائی اہم تصور کیے جا رہے ہیں اور مذاکرات کی ناکامی بڑی طاقتوں اور روس کے درمیان خوفناک محاذ آرائی کا آغاز ہو سکتی ہے۔
