paksahafat پاک صحافت
Related Articles
لکھنو {پاک صحافت} بھارتی ریاست اتر پردیش میں بھارتیہ جنتا پارٹی کی حکومت نے آبادی پر قابو پانے کے لئے ایک مسودہ تیار کیا ہے ، جس کی بڑے پیمانے پر تنقید کی جارہی ہے۔
ریاست کے لاء کمیشن نے متنازعہ اتر پردیش پاپولیشن کنٹرول بل کا مسودہ تیار کیا ہے ، جس کے تحت دو بچوں کی پالیسی پر عمل درآمد کرنے کا انتظام ہے۔
اس مسودے میں سفارش کی گئی ہے کہ ‘دو بچوں کی پالیسی’ کی خلاف ورزی کرنے والوں کو بلدیاتی انتخابات لڑنے ، سرکاری ملازمت حاصل کرنے اور پروموشن لینے سے روک دیا جائے گا اور وہ حکومت کی جانب سے کسی سبسڈی کے حقدار نہیں ہوں گے۔
کمیشن کے تیار کردہ مسودہ کو اپنی ویب سائٹ پر اپ لوڈ کردیا گیا ہے اور لوگوں سے 19 جولائی تک اس پر اپنے خیالات کا اظہار کرنے کو کہا گیا ہے۔
اسی کے ساتھ ہی بل کے مسودے میں بھی آبادی کی پالیسی پر عمل کرنے والوں کو اضافی سہولیات فراہم کرنے کی سفارش کی گئی ہے۔
ماہرین نے جہاں بل کی دفعات کو بہت ہی الجھاؤ قرار دیا ہے ، وہیں بل کے وقت اور ارادے پر بھی سوال اٹھائے ہیں۔
بہت سارے ماہرین نے اس قانون کی نوعیت کو آمرانہ قرار دیا ہے ، جبکہ بہت سے لوگوں نے ریاست میں اسمبلی انتخابات سے قبل ہی مسلمانوں کو نشانہ بنانے اور ہندوؤں کو پولرائز کرنے کی چال قرار دیا ہے۔
اگرچہ ریاست کی یوگی حکومت نے اس کا دفاع کیا ہے اور امید ظاہر کی ہے کہ ہر کوئی اس قانون کا خیرمقدم کرے گا ، لیکن بیشتر ماہرین اور حزب اختلاف کے رہنماؤں نے اسے مسترد کردیا ہے۔
