پاکستانی نژاد ڈاکٹر نقیب خالد کا اہم کارنامہ، اسمارٹ فون کے استعمال کے ذریعے کورونا وائرس کا فوری تشخیصی ٹیسٹ متعارف کروا دیا

پاکستانی نژاد ڈاکٹر نقیب خالد کا اہم کارنامہ، اسمارٹ فون کے استعمال کے ذریعے کورونا وائرس کا فوری تشخیصی ٹیسٹ متعارف کروا دیا

کینیڈا کے شہر ٹورنٹو میں مقیم پاکستانی نژاد ڈاکٹر نے اسمارٹ فون کا استعمال کرتے ہوئے کورونا وائرس کا فوری تشخیصی ٹیسٹ متعارف کروا دیا، کینیڈا میں پاکستان کے ہائی کمشنر رضا بشیر تارڑ نے ڈاکٹر نقیب خالد کو اس غیر معمولی کامیابی پر مبارکباد دی۔

مونٹریال میں 2 فوٹون ریسرچ اِن کارپوریٹڈ میں ڈائریکٹر میڈیکل ڈیوائس پروگرام کی حیثیت سے اسمارٹ فون کے ذریعے کووڈ 19 کی تشخیص کرنے والے ڈاکٹر نقیب خالد سے پاکستانی ہائی کمشنر نے ویڈیو گفتگو کی۔

ویڈیو میں ہائی کمشنر رضا بشیر تارڑ نے کہا کہ اسمارٹ فون کے ذریعے کووِڈ ٹیسٹ ظاہر کرنا اور اسے آگے پہنچانے کا خیال عمدہ اور قابل ستائش ہے۔

انہوں نے اُمید ظاہر کی کہ یہ جنجھٹ سے آزاد، قابل رسائی اور سستی ایجاد موجودہ عالمی وبا پر قابو پانے اور وائرس پھیلنے والے وبائی امراض مثلاً ڈینگی سے لڑنے میں انسانیت کے لیے بے حد معاون ثابت ہوگی۔

ہائی کمشنر نے اس اُمید کا اظہار کیا کہ اس ایجاد کے کلینک ٹرائلز کووِڈ 19 ٹیسٹ کے لیے اس کی افادیت کو ثابت کریں گے اور عوامی سطح پر استعمال کے لیے درکار منظوری کی راہ ہموار کریں گے۔

انہوں نے ڈاکٹر نقیب خالد اور ان کے بھائی کے لیے نیک خواہشات کا اظہار کیا جنہوں نے انجینئرنگ اور سائنس مضامین کے مختلف شعبوں میں اپنے پس منظر کی وجہ سے ان سے اشتراک کیا تھا۔

ڈاکٹر نقیب خالد نے 1983 میں کنگ ایڈورڈ میڈیکل یونیورسٹی سے گریجویشن کرنے کے بعد میڈیکل آلات اور نظام میں ایجادات کا تجربہ حاصل کیا تھا۔

انہوں نے پاکستانی ہائی کمشنر کو بتایا کہ ان کی ایجاد ایک ڈیجیٹل پلیٹ فارم کی بنیاد پر ہے جو نتائج کو فوری طور پر کسی بھی اسمارٹ فون پر ظاہر کردیتا ہے بلکہ وقت اور جی پی ایس معلومات کے ساتھ ان نتائج کو محفوظ اور آگے بھی بڑھا سکتا ہے۔

ڈاکٹر نجیب خالد نے بتایا کہ اس سلسلے میں ایپلیکشن اسٹور پر ایک اسمارٹ فون ایپ ڈاؤن لوڈ کے لیے دستیاب ہوگی۔

انہوں نے مزید کہا کہ ویکسین کے ساتھ ساتھ عالمی وبا کی روک تھام کے لیے ایسے فوری، درست اور کم قیمت ٹیسٹ ضروری ہیں جو لیبارٹری پر منحصر نہ ہو۔

پاکستانی نژاد ڈاکٹر نے کہا کہ ہم کورونا وائرس کا پھیلاؤ کنٹرول کر کے زندگی اور معیشتوں کو معمول پر لاسکتے ہیں۔

جواب چھوڑ دیں

براہ مہربانی اپنی رائے درج کریں!
اپنا نام یہاں درج کریں