(پاک صحافت) پاکستان ٹیلی کمیونیکیشن اتھارٹی (پی ٹی اے) نے وضاحت جاری کی ہے کہ یوٹیوب کی بندش کے حوالے سے جو نوٹس سوشل میڈیا پر گردش کر رہا ہے، وہ 2012 کا ہے اور موجودہ حالات سے اس کا کوئی تعلق نہیں۔
واضح رہے کہ اُس وقت کے وزیر اعظم راجا پرویز اشرف نے ستمبر 2012 میں یوٹیوب کو فوری طور پر بند کرنے کا حکم دیا تھا، جب تک یوٹیوب گستاخانہ مواد کی حامل فلم نہیں ہٹائے گا اس وقت تک پابندی برقرار رکھی جائے گی۔ پی ٹی اے کی جانب سے جاری بیان میں کہا گیا ہے کہ حالیہ دنوں میں ایک پرانی پریس ریلیز سوشل میڈیا پر دوبارہ شیئر کی جا رہی ہے، جس سے عوام میں یوٹیوب کی موجودہ حیثیت کے بارے میں غلط فہمیاں پیدا ہو رہی ہیں۔
بیان میں کہا گیا ہے کہ پی ٹی اے واضح کرتا ہے کہ جو مواد گردش کر رہا ہے وہ پرانا ہے اور موجودہ حالات سے اس کا کوئی تعلق نہیں ہے، پی ٹی اے کی جانب سے یوٹیوب یا کسی بھی دیگر سوشل میڈیا پلیٹ فارم کو بلاک یا بند کرنے کے لیے کوئی ہدایات جاری نہیں کی گئیں۔ عوام کو مشورہ دیا گیا ہے کہ درست معلومات کے لیے صرف پی ٹی اے کی آفیشل ویب سائٹ اور تصدیق شدہ سوشل میڈیا اکاؤنٹس پر انحصار کریں۔