paksahafat پاک صحافت
Related Articles
کراچی (پاک صحافت) گورنر سندھ اپنی بیٹی کے ساتھ طلبہ کا استقبال کرنے کراچی ایئرپورٹ پہنچ گئے۔
تفصیلات کے مطابق اس موقع پر گفتگو کرتے ہوئے گورنر سندھ کامران ٹیسوری نے کہا ہے کہ کرغزستان سے مزید 180 طلبہ کی کراچی واپسی ممکن بنادی۔ بشکیک میں پھنسے سندھ کے طالبعلم میرے بیٹے اور بیٹی جیسے ہیں۔ خوف کا شکار اپنے بچوں کو بشکیک سے لانے کا وعدہ پورا کردیا۔
کامران ٹیسوری کا مزید کہنا تھا کہ بچوں کے والدین نے امید کی گھنٹی بجا کر مجھ سے ملاقات کی تھی۔ میں نے وزیر خارجہ اسحق ڈار سے کراچی کےلیے اسپیشل پروازوں کی اجازت مانگی تھی۔ وزیر خارجہ اسحق ڈار کا شکر گزار ہوں، انہوں نے کراچی کےلیے پروازیں ممکن بنائیں۔
انہوں نے کہا کہ اسپیشل فلائٹس کے لیے وزیراعظم، وزیراعلی سندھ سمیت سب کا مشکور ہوں۔ مزید طلبا کی واپسی کے لیے بھی کوششیں جاری ہیں، عوامی گورنر کا خطاب دینے والوں نے جو ذمہ داری عائد کی ہے، نبھاتا رہوں گا۔
طلبہ کے والدین گورنر سندھ کے حق میں پلے کارڈ لے کر کراچی ایئرپورٹ پہنچے۔ کرغزستان سے وطن واپس آنے والے طلبہ کے والدین ’شکریہ عوامی گورنر‘ کے پلے کارڈ اٹھائے ہوئے تھے۔
