راولپنڈی (پاک صحافت) مسلم لیگ ن کے رہنما حنیف عباسی کا کہنا ہے کہ پاکستان تحریک انصاف کا 2023 کا کیلیفورنیا پلان یہ ہے کہ ملک کو عدم استحکام کی طرف دھکیلا جائے۔
تفصیلات کے مطابق پریس کانفرنس کرتے ہوئے حنیف عباسی نے کہا ہے کہ پہلے پی ٹی آئی والے کہتے تھے امریکا نے حکومت گرائی آج یہ اس سے بھیک مانگ رہے ہیں، انہوں نے آٹھ سے دس لابنگ فرم ہائر کیں۔ کانگریس اراکین کے ذریعے دس خطوط لکھے گئے، انہیں بھی ہائر کیا گیا، کیلیفورنیا پلان یہ ہے کہ آپ کو حکومت میں لائیں گے بدلے میں نیوکلئیر پاور پر بات کرنا ہوگی۔
رہنما مسلم لیگ ن نے کہا کہ خوارج، بی ایل اے اور پی ٹی آئی میں کوئی فرق نہیں، ان لوگوں کا کڑا احتساب ہوگا جو اداروں کے خلاف سازش کررہے ہیں، جیسے فتنہ خوارج کا خاتمہ کیا اسی طرح فتنہ سیاست کا بھی خاتمہ کریں گے۔
حنیف عباسی نے کہا کہ آج مذاکرات کی بات ہو رہی ہے آج بلی تھیلے سے باہر آگئی ہے، پہلے یہ کہتے تھے امریکا نے حکومت گرائی آج یہ اس سے بھیک مانگ رہے ہیں۔ نواز شریف نے دھماکے کیے تو کہاں کہاں سے آفر آئی سب جانتے ہیں، ہم نے کوئی سمجھوتہ نہیں کیا، ہم کٹ کر مرجائیں گے ایٹمی پلانٹ پر سمجھوتہ نہیں ہوگا۔