کراچی (پاک صحافت) پاکستان پیپلزپارٹی کے چیئرمین بلاول بھٹوزرداری نے وزیر اعظم عمران خان کو ایک بار پھر آڑے ہاتھوں لے لیا، بلاول کا کہنا ہے کہ عمران خان ملک کو اتنا بدحال کرچکے کہ دہائیوں تک ہرجانہ بھراجائےگا، ان کا کہنا ہے کہ آئندہ نسلوں نے عمران خان کی تبدیلی کی خوف ناک قیمت ادا کرنی ہے۔
تفصیلات کے مطابق پاکستان پیپلزپارٹی کے چیئرمین بلاول بھٹوزرداری نے اپنے بیان میں وفاقی حکومت کو تنقید کا نشانہ بناتے ہوئے کہا کہ عمران خان کو معاشی بحران ورثے میں نہیں ملا، سلیکٹڈ وزیراعظم نے ملک میں معاشی بحران پیدا کیا ہے ، عمران خان کا سب سے بڑا جرم ملک کےنوجوانوں کی امیدوں کا قتل ہے، وہ حکمران کیسےملک چلاسکتا ہے جس کی باتوں کو کوئی سنجیدہ لینے کو تیار نہیں۔
واضح رہے کہ عمران خان کا ملک کو خیراتی ادارے کی طرزپر چلانے کا تجربہ ناکام ہوگیا، جتنی تباہی عمران خان نے کی اتنی ملک کی مجموعی تاریخ میں کبھی نہ ہوئی۔ ان کا مزید کہنا تھا کہ وبا بعد میں آئی ہے، عمران خان پہلے ہی معیشت کا جنازہ نکال چکے تھے،موجودہ حکومت میں پاکستان بدترین سیاسی، انتظامی اور مالی بحران کاشکار ہے، صورت حال یہ ہے کہ پی ٹی آئی کے منتخب نمائندے عوام سے منہ چھپاتے پھررہے ہیں۔