paksahafat پاک صحافت
Related Articles
اسلام آباد (پاک صحافت) شیری رحمان کا کہنا ہے کہ سپریم کورٹ کے فیصلے کے بعد صدر عارف علوی کو مستعفی ہوجانا چاہئے، ان کے پاس عہدے پر باقی رہنے کا کوئی آئینی جواز نہیں ہے۔
تفصیلات کے مطابق وفاقی وزیر اور پیپلزپارٹی کی رہنما شیری رحمان نے سماجی رابطے کی ویب سائٹ پر ایک بیان جاری کرتے ہوئے کہا ہے کہ ڈپٹی اسپیکر کی غیرآئینی رولنگ کے خلاف از خود نوٹس پر سپریم کورٹ کا فیصلہ بیرونی سازش کے بیانیے کے تابوت میں آخری کیل ہے۔
شیری رحمان کا مزید کہنا ہے کہ عدالت کے مطابق اسپیکر کی رولنگ، وزیراعظم کا اسمبلی تحلیل کرنے کا حکم اور صدر کا اسمبلی تحلیل کرنے کا اقدام غیرآئینی، سیاسی جماعتوں کے حقوق کی خلاف تھا۔ مفروضوں کی بنیاد پر رولنگ دے کر آئین اور پارلیمنٹ کی توہین کی گئی، بغیر تفتیش کے اسپیکر نے رولنگ دی۔ انہوں نے کہا کہ عدالت نے واضح کردیا ہے کہ اسپیکر اور ڈپٹی اسپیکر نے بار بار آئین کی تضحیک اور خلاف ورزی کی، فیصلے سے واضح ہوگیا کہ اس سارے معاملے میں صدر کا کردار جانبدار رہا۔ وہ آئین کا نہیں صرف تحریک انصاف کے مفاد کا تحفظ کرتے رہے۔
