paksahafat پاک صحافت
Related Articles
پاک صحافت مختلف ممالک کی یونیورسٹیوں کے 500 سے زائد ماہرین تعلیم نے جنوبی ایشیائی تنظیم برائے علاقائی تعاون “سارک” ممالک کے وزرائے خارجہ کو خط لکھ کر نئی دہلی میں قائم ساؤتھ ایشین یونیورسٹی کے چار فیکلٹی ممبران کی معطلی کے سلسلے میں مداخلت کی درخواست کی ہے۔
چاروں اساتذہ پر یونیورسٹی کے ضابطہ اخلاق کی خلاف ورزی کرتے ہوئے طلبہ کو یونیورسٹی کے مفادات کے خلاف اکسانے کا الزام ہے۔
یہ کارروائی پوسٹ گریجویٹ طلباء کے ماہانہ وظیفہ میں کٹوتی کے خلاف پچھلے سال طلباء کے کئی مہینوں کے احتجاج کے بعد کی گئی ہے۔
خط میں کہا گیا ہے کہ 16 جون 2023 کو یونیورسٹی انتظامیہ نے یونیورسٹی کے چار فیکلٹی ممبران کو معطل کر دیا تھا کیونکہ انہوں نے طلباء کے خلاف انتظامیہ کے غیر انسانی سلوک اور من مانی تعزیری کارروائیوں پر تشویش کا اظہار کیا تھا۔
جن فیکلٹی ممبران کو معطل کیا گیا ہے ان میں فیکلٹی آف اکنامکس کے ڈاکٹر سنیہاشیش بھٹاچاریہ، فیکلٹی آف لیگل اسٹڈیز کے ڈاکٹر سرینواس بررا، ڈاکٹر عرفان اللہ فاروقی اور سوشیالوجی ڈیپارٹمنٹ کے ڈاکٹر روی کمار شامل ہیں۔
خط میں کہا گیا ہے کہ یہ پروفیسر اس بات پر سوال اٹھا رہے تھے جس میں یونیورسٹی نے ان طلباء کے خلاف کارروائی کی جو گزشتہ سال اپنے ماہانہ وظیفہ میں کمی کے خلاف احتجاج کر رہے تھے اور مبینہ طور پر جنسی طور پر ہراساں کرنے اور صنفی حساسیت کے خلاف احتجاج کر رہے تھے۔وہ کمیٹیوں میں مناسب نمائندگی کا مطالبہ کر رہے تھے۔
خط میں کہا گیا ہے کہ انتظامیہ نے ان کے مطالبات پر کان دھرنے کے بجائے پولیس کو طلب کر کے ان طلباء کو منتشر کر دیا جو احتجاج کا اپنا جمہوری حق استعمال کر رہے تھے۔
یہ بھی بتایا جاتا ہے کہ معطل اساتذہ نے پولیس کو طلبا کے خلاف مداخلت کرنے کے لیے کیمپس میں بلائے جانے اور انتظامیہ کی جانب سے احتجاجی طلبہ کے خلاف اٹھائے گئے انتقامی اقدامات پر اپنے تحفظات درج کرائے تھے۔ پروفیسر یونیورسٹی پر زور دے رہے تھے کہ وہ طلباء کے خدشات کو دور کرے اور تنازعات کو حل کرنے کے لیے تعمیری انداز اپنائے۔
خط میں سارک ممالک کے وزرائے خارجہ کو مخاطب کرتے ہوئے کہا گیا ہے کہ ہم آپ سب سے اس سلسلے میں مداخلت کرنے کی درخواست کرتے ہیں اور ایس اے یو انتظامیہ سے درخواست کرتے ہیں کہ وہ فوری طور پر غیر معقول اور من مانی معطلی کے احکامات کو منسوخ کریں اور یونیورسٹی میں ایک سازگار تعلیمی ماحول قائم کریں۔
