paksahafat پاک صحافت
Related Articles
(پاک صحافت) پاکستانی معروف اداکار حمزہ علی عباسی نے ایک پوڈ کاسٹ میں شرکت کرتے ہوئے فلموں میں آئٹم نمبر گانوں کی سختی سے مخالفت کردی۔ خیال رہے کہ حال ہی میں سوشل میڈیا کے مختلف پلیٹ فارمز پر ایک پوڈکاسٹ سے حمزہ علی عباسی کے انٹرویو کا ویڈیو کلپ وائرل ہو رہا ہے جس میں وہ ساتھی فنکاروں کے ہمراہ عام گانے اور آئٹم نمبر پر کھل کر بات کر رہے ہیں۔
مذکورہ وائرل کلپ میں میزبان اداکار سے آئٹم نمبر کے حوالے سے سوال کرتے ہیں، جس پر حمزہ علی عباسی نے کہا کہ میں آئٹم نمبرز کے حق میں نہیں ہوں، ایسے گانے جنسی طور پر اشتعال دلانے یا جنسی خواہشات کو بیدار کرنے والی شاعری اور مناظر پر مبنی ہوتے ہیں۔ انہوں نے کہا کہ یہ ہم خود کو جھوٹی تسلیاں دیتے ہیں کہ ایک ہاٹ ہوتا ہے، ایک ولگر ہوتا ہے یا ایک سیکسی ہوتا ہے۔ ایسا کچھ نہیں ہے یا تو ایک آئٹم نمبر ہوتا ہے یا عام گانے ہوتے ہیں ان کے بیچ کا کچھ نہیں ہوتا، دونوں میں فرق ہوتا ہے۔
انہوں نے مزید وضاحت دیتے ہوئے کہا کہ وہ گانے جس میں صرف رقص دکھایا جائے اور کوئی نیم عریاں اور بولڈ منظر نہ ہوں وہ عام گانے ہوتے ہیں جن کی مخالفت نہیں کرتے لیکن ایسے کسی بھی گانے کی حمایت کبھی نہیں کریں گے جو آئٹم نمبر ہو، بیہودہ شاعری اور مناظر پر مبنی ہو۔ اس موقع پر حمزہ علی عباسی کے ساتھ اداکارہ ہانیہ عامر بھی موجود تھی اور انہوں نے بھی ساتھی فنکار کی بات سے اتفاق کیا اور کہا کہ ان مسائل پر کھل کر بات ہونے کی ضرورت ہے تاکہ فلمز میں بہتری لائے جائے۔
