لاہور (پاک صحافت) وزیراعلیٰ پنجاب مریم نواز کا کہنا ہے کہ بھارت طیارے، ڈرونز گرانے کی شرمناک شکست کا بدلہ عام شہریوں سے لینے کی کوشش کر رہا ہے۔ انہوں نے لاہور سمیت دیگر 12 مقامات پر ڈرون حملوں کی شدید مذمت کی اور بھارتی ڈرون بروقت گرانے پر پاک فوج کو خراج تحسین پیش کیا۔
مریم نواز نے انتظامیہ، پولیس، ریسکیو سروسز اور پاک فضائیہ کے بروقت رسپانس کو سراہا اور کہا کہ پاک فضائیہ کے شاہینوں، بری اور بحری فوج کے شیروں کو قوم سلام پیش کرتی ہوں۔ مریم نواز کا کہنا ہے کہ شہداء کا خون رائیگاں نہیں جائے گا، ایک ایک قطرے کا حساب دینا ہوگا، بھارت نے آبی ذخائر پر حملہ کر کے عالمی قوانین کی واضح خلاف ورزی کی ہے۔ انہوں نے کہا کہ قوم اپنی بہادر افواج کے ذریعے بھارتی غرور اور تکبر کو خاک میں ملاتی رہے گی۔
مریم نواز نے لاہور، گوجرانوالہ، راولپنڈی اور صوبے بھر کے مختلف شہروں میں پولیس اور دیگر اداروں کو الرٹ رہنے کی ہدایت جاری کی۔ وزیراعلیٰ پنجاب نے ڈرون حملوں میں زخمیوں کی جلد صحت یابی کی دعا کی اور ہدایت دیتے ہوئے کہا کہ ڈرون حملوں کے دوران زخمی ہونے والے شہری اور افسران کا بہترین علاج کیا جائے اور انتظامی افسران زخمیوں کے علاج کی مانیٹرنگ کریں۔
انہوں نے کہا کہ کمسن بچوں سمیت بے گناہ شہریوں کو شہید کر کے بھارت نے جارحیت کی۔ بھارت کو بےگناہ شہریوں پر حملے کا خمیازہ بھگتنا ہوگا۔ پوری قوم پاک فوج کے افسران اور سپاہیوں کو سلام پیش کرتی ہے۔ مریم نواز کا کہنا ہے کہ دنیا بھر میں بھارتی پائلٹ نااہلی اور ناکامی کا استعارہ بن چکے ہیں، بھارت کا غرور رافیل طیاروں کی طرح زمین پر ملبے کا ڈھیر بن چکا ہے۔ بھارت عام شہریوں کو نشانہ بنا کر روایتی بزدلی کا مظاہرہ کر رہا ہے۔