paksahafat پاک صحافت
Related Articles
اسلام آباد (پاک صحافت) پاکستان پیپلز پارٹی کی مرکزی رہنما سینیٹر شیری رحمان نے کہا ہے کہ تحریک انصاف مسلسل غیر ملکی مداخلت کو دعوت دے رہی ہے۔
تفصیلات کے مطابق شیری رحمان نے امریکی کانگریس ارکان کے صدر جوبائیڈن کو لکھے گئے خط میں پر ردعمل دیا ہے۔ انہوں نے کہا کہ پی ٹی آئی مسلسل اپنے بانی چیئرمین کی رہائی کے لیے غیر ملکی مداخلت کو دعوت دے رہی ہے۔ امریکی ارکان کانگریس کا صدر بائیڈن کو خط حقیقی آزادی کے بیانیے کے تابوت میں ایک اور کیل ہے۔
شیری رحمان کا کہنا تھا کہ امریکی ارکان کانگریس کا خط پاکستان کے داخلی معاملات میں واضح مداخلت ہے، دوسرے ملک کے سیاسی اور قانونی معاملات میں مداخلت بین الاقوامی اصولوں کےخلاف ہے۔ خط پاکستان کے سیاسی نظام اور عدلیہ کی خودمختاری کو چیلنج کرتا ہے، خط خطرناک مثال بھی قائم کرتا ہے کہ کوئی ملک مداخلت کو جائز سمجھنے لگے۔
انہوں نے کہا کہ تحریک انصاف کی امریکا میں پاکستان کے خلاف لابنگ کی کوششیں بھی قابل مذمت ہیں، یہ وہی سیاسی جماعت ہے جو ماضی میں امریکی مداخلت پر بیانیہ بناکر سیاست کرتی رہی ہے، تحریک انصاف کا اب خود ایسی مداخلت کا سہارا لینا دہرا معیار ہے۔
