اسلام آباد (پاک صحافت) وزیر خزانہ محمد اورنگزیب نے ایف بی آر کو ہدف حاصل کرنے کیلئے ہر ممکن کوشش کی ہدایت کی ہے۔
تفصیلات کے مطابق وفاقی وزیر خزانہ و محصولات نے فیڈرل بورڈ آف ریونیو کے ہیڈکوارٹرز کا دورہ کرتے ہوئے محصولات کی وصولی کے حوالے سے ایف بی آر کی کارکردگی کا جائزہ لینے کے لیے اجلاس کی صدارت کی، جس میں چیئرمین ایف بی آر اور بورڈ کے اراکین نے شرکت کی۔
اجلاس کے دوران چیئرمین ایف بی آر نے وفاقی وزیر کو رواں مالی سال کے لیے ایف بی آر کی محصولات اکٹھا کرنے کی کوششوں کے بارے میں تفصیلی بریفنگ دی۔ چیئرمین نے ایف بی آر کی کارکردگی کو مزید بہتر بنانے کے لیے اس کی ڈیجیٹلائزیشن کے لیے کیے جانے والے اقدامات کے بارے میں بھی بتایا۔
وزیر خزانہ نے ٹیکس ٹو جی ڈی پی کے تناسب کو بڑھانے اور محصولات کی وصولی کو زیادہ سے زیادہ کرنے کے لیے ٹیکس کی بنیاد کو وسیع کرنے کے لیے حکمت عملی وضع کرنے پر زور دیا۔