paksahafat پاک صحافت
Related Articles
کیلیفورنیا (پاک صحافت) سماجی رابطوں کی مقبول ترین ایپلی کیشن انسٹاگرام صارفین کے لیے بیک وقت کئی فیچرز پر کام کر رہا ہے تاہم ممکن ہے جلد ہی ایپ پر فوٹو شیئرنگ نہیں کی جا سکے گی۔ اس حوالے سے انسٹاگرام کے سربراہ ایڈم موزیری نے کہا ہے کہ اب سے ہم فوٹو شیئرنگ ایپ نہیں ہوں گے کیونکہ ہمارے سروے کے مطابق لوگ انسٹاگرام انٹرٹینمنٹ کیلئے استعمال کرتے ہیں، لوگ ہم سے یہی توقع رکھتے ہیں اسی لیے ہم نے ویڈیوز سمیت دیگر ذرائع سے لوگوں کو انٹرٹینمنٹ فراہم کرنے کا سوچا ہے۔
تفصیلات کے مطابق انسٹاگرام کے سربراہ ‘ایڈم موزیری’ نے کچھ روز قبل ٹوئٹر پر پیغام جاری کیا جس میں انہوں نے بتایا کہ ہم لوگوں کی دلچسپی دیکھتے ہوئے کریئٹرز، ویڈیوز، شاپنگ اور میسیجنگ کے ایریا پر کام کر رہے ہیں چونکہ اب لوگ انفرادی طور پر کچھ کرنے کے قائل ہیں اسی لیے کریٹرز کے لیے ہم کچھ نیا لائیں گے۔
واضح رہے کہ ویڈیوز کے حوالے سے انہوں نے کہا کہ یہ لوگوں تک رسائی حاصل کرنے کا آسان طریقہ ہوتی ہیں، اور یہ ہر بڑے پلیٹ فارم کو بڑھانے میں معاون ثابت ہوتی ہیں۔ شاپنگ کے حوالے سے ایڈم نے کہا کہ ای کامرس کا بزنس کووڈ میں بہت پروان چڑھا اسی لیے اس کو ہم نے بہتر بنانے کا سوچا ہے۔ علاوہ ازیں انہوں نے پیغام رسانی کو ضروری سمجھتے ہوئے میسجز کے آپشن کو اہم قرار دیا اور کہا یہ پچھلے کچھ سالوں میں کافی ترقی کر چکا ہے۔
