paksahafat پاک صحافت
Related Articles
اسلام آباد (پاک صحافت)وزیر خارجہ شاہ محمود قریشی نےقطر اور خلیجی ممالک کے مابین تنازعات کے حل کو خطے میں امن اور استحکام کیلئے مثبت قدم قرار دیا اس قدم سے خلیجی ممالک کے مابین اعتماد اور تعاون کو فروغ ملے گا۔انہوں نے سعودی عرب کے مثبت کردار کو سراہا۔
تفصیلات کے مطابق وزیر خارجہ شاہ محمود قریشی نے سعودی عرب، قطر اور بحرین کے ہم منصبوں سے ٹیلی فونک گفتگو میں خلیج تعاون کونسل (جی سی سی) ممالک کی جانب سے دیرینہ تنازعات کے حل کے لیے آمادگی اور مثبت رویئے کو سراہتے ہوئے اسے خطے میں امن و استحکام کے لیے نیک شگون قرار دیا۔
مزید پڑھیں: ایشیائی ارکان پارلیمان نے عرب ممالک کے اسرائیل کے ساتھ تعلقات کی بحالی کو مسترد کردیا
دفتر خارجہ سے جاری بیان کے مطابق شاہ محمود قریشی نے سعودی عرب کے وزیر خارجہ شہزادہ فیصل بن فرحان آل سعود سے ٹیلی فون پر گفتگو میں دوطرفہ تعلقات، جی سی سی ممالک کے درمیان تنازعات کے حل کے لیے کی جانے والی سفارتی کاوشوں سمیت باہمی دلچسپی کے امور پر تبادلہ خیال کیا۔
وزیر خارجہ نے قطر اور خلیجی ممالک کے مابین تنازعات کے حل کے لیے سعودی عرب کے مثبت کردار کو سراہا۔ انہوں نے اپنے سعودی ہم منصب کو کورونا وبا کے باوجود جی سی سی اجلاس کے کامیاب انعقاد پر مبارکباد دی۔شاہ محمود نے نیامے میں اسلامی تعاون تنظیم (او آئی سی) کے وزرائے خارجہ کونسل کے اجلاس کے موقع پر مسئلہ کشمیر اور اسلامو فوبیا کے بڑھتے ہوئے رجحان کے خلاف قراردادوں پر سعودی عرب کی حمایت پر سعودی وزیر خارجہ کا شکریہ ادا کیا۔
قطر کے وزیر خارجہ محمد بن عبدالرحمٰن الثانی سے ٹیلی فونک گفتگو کے دوران دونوں وزرائے خارجہ کے مابین دوطرفہ تعلقات اور خلیجی ممالک کے درمیان تنازعات کے حل کے لیے کی جانے والی سفارتی کاوشوں کے حوالے سے تبادلہ خیال ہوا۔ وزیر خارجہ نے خلیجی ممالک کے باہمی تنازعات کے حل کے لیے خلیجی ریاستوں کی جانب سے مثبت ردعمل اور سعودی شہر العلا میں جی سی سی کے کامیاب اجلاس پر قطری ہم منصب کو مبارکباد دی۔
انہوں نے توقع ظاہر کی کہ جی سی سی اجلاس 2021ء کے کامیاب انعقاد کے بعد خلیجی ممالک کے مابین اعتماد اور تعاون کو فروغ ملے گا اور خطے میں امن و امان کی صورتحال میں بہتری آئے گی۔ ادھر بحرین کے وزیر خارجہ عبدالطیف بن راشد الزایانی نے پاکستانی ہم منصب کے ساتھ ٹیلی فونک رابطہ کیا، جس میں دونوں وزرائے خارجہ نے خلیج میں پیشرفت کو سراہا۔ دونوں وزرائے خارجہ نے پاکستان اور بحرین کے درمیان مختلف شعبوں میں دوطرفہ تعاون کو بڑھانے کے حوالے سے بھی تبادلہ خیال کیا۔
