paksahafat پاک صحافت
Related Articles
تھران {پاک صحافت} رہبر معظم انقلاب اسلامی ایران نے ملک کے بیشتر علاقوں میں سیلاب اور اس سے ہونے والے نقصانات کے حوالے سے حکام کے نام ایک اہم پیغام میں تاکید کی ہے کہ سیلاب سے ہونے والے نقصانات کا جلد از جلد ازالہ کیا جائے اور ضروری اقدامات کیے جائیں۔
رہبر معظم انقلاب اسلامی حضرت آیت اللہ العظمی سید علی خامنہ ای نے ایران کے بیشتر علاقوں میں سیلاب کی وجہ سے ہونے والے نقصانات پر گہری تشویش کا اظہار کرتے ہوئے اپنے پیغام میں سب سے پہلے سیلاب زدگان سے تعزیت کا اظہار کیا، اس کے ساتھ ساتھ حکام اور امدادی کارکنوں کی طرف سے بھی انہوں نے سیلاب زدگان کی فوری مدد کرنے پر ان کا شکریہ ادا کیا اور کہا کہ متاثرین کی ہر ممکن مدد مستقبل میں بھی جاری رکھی جائے۔ آیت اللہ العظمی سید علی خامنہ ای نے اپنے بیان میں تاکید کی ہے کہ ملک کے کئی علاقوں میں ہولناک اور تباہ کن سیلاب نے ہمارے ملک کے بہت سے عزیزوں کو جانی، مالی اور جذباتی نقصان پہنچایا ہے۔ ہم سیلاب متاثرین کے تئیں اپنی گہری تعزیت کا اظہار کرتے ہیں۔
سپریم لیڈر نے ملک کے حکام کو ہدایت کی ہے کہ وہ سیلاب سے ہونے والے نقصانات کے ازالے کے لیے فوری طور پر ضروری اقدامات کریں۔ اپنے پیغام میں انہوں نے کہا ہے کہ میں سیلاب سے متاثرہ علاقوں میں حکام اور عوامی امدادی گروپوں کی فوری موجودگی اور ان کی طرف سے سیلاب زدگان کی مدد کرنے پر شکریہ ادا کرنا ضروری سمجھتا ہوں۔ رہبر معظم انقلاب اسلامی نے فرمایا کہ ہم سب کا فرض ہے کہ ہم ان مقدس کاموں کو جاری رکھیں اور ان تکلیف دہ واقعات کے اثرات کو کم کرنے کے لیے مسلسل کوششیں کریں۔
