paksahafat پاک صحافت
Related Articles
لندن {پاک صحافت} برطانوی وزیراعظم نے دنیا بھر کے ممالک کو خبردار کرتے ہوئے دعویٰ کیا ہے کہ روسی صدر پیوٹن نے دوسری عالمی جنگ کے بعد یورپ میں سب سے بڑی جنگ کا بلیو پرنٹ تیار کر لیا ہے۔
موصولہ رپورٹ کے مطابق برطانوی وزیراعظم بورس جانسن نے یوکرین اور روس کے درمیان جنگ جیسی صورتحال کے حوالے سے دنیا بھر کے ممالک کو وارننگ دی ہے۔ بورس جانسن نے کہا ہے کہ روسی صدر ولادی میر پیوٹن دوسری عالمی جنگ کے بعد یورپ میں سب سے بڑے حملے کی تیاری کر رہے ہیں۔ انہوں نے یہ بھی کہا کہ ایسے اشارے مل رہے ہیں کہ پیوٹن کا منصوبہ اب کسی حد تک شروع ہو گیا ہے۔ برطانوی وزیر اعظم نے کہا کہ انٹیلی جنس رپورٹس سے پتہ چلتا ہے کہ روس بیلاروس کے ذریعے 2.8 ملین کی آبادی والے یوکرین کے دارالحکومت کیف کو گھیرے میں لے کر حملے کی تیاری کر رہا ہے۔
بورس جانسن نے میونخ سیکیورٹی کانفرنس کے بعد کہا، ‘ہم جو منصوبہ دیکھ رہے ہیں، اس کے مطابق یہ سال وسیع بنیادوں پر یورپ میں 1945 کے بعد اب تک کی سب سے بڑی جنگ ہو سکتی ہے۔’ جانسن کا یہ بیان ایک ایسے وقت میں سامنے آیا ہے جب امریکی صدر جو بائیڈن نے خبردار کیا ہے کہ روسی افواج آنے والے دنوں میں یوکرین پر حملہ کرنے کا ارادہ رکھتی ہیں۔ اس میں کیف کو نشانہ بنانا بھی شامل ہے۔ بورس جانسن نے کہا کہ لوگوں کو یہ سمجھنے کی ضرورت ہے کہ اس جنگ میں روس اور یوکرین دونوں کے بہت سے لوگ مارے جائیں گے۔ انہوں نے کہا کہ تمام اشارے یہ ہیں کہ پیوٹن نے اپنے منصوبے پر کام شروع کر دیا ہے۔
ادھر روس نے جنگ کے تمام امکانات کو مسترد کر دیا ہے۔ روس کا کہنا ہے کہ امریکی حکام یوکرین کو مزید ہتھیار دینے اور نیٹو کو وسعت دینے کے لیے ایسے جھوٹ پھیلا رہے ہیں۔ روسی نائب وزیر خارجہ نے کہا ہے کہ ہم یوکرین پر حملہ کرنے والے نہیں اور ہمارا ایسا کوئی ارادہ نہیں ہے۔ ہمارا مطالبہ صرف یہ ہے کہ واشنگٹن اور نیٹو ماسکو کی سکیورٹی تجاویز کو قبول کریں۔ تاہم امریکا اور نیٹو نے روس کو منفی جواب دیا ہے جس سے کشیدگی میں اضافے کا خدشہ ہے۔
